Hyginus (Bischof von Rom)

Dr Hyginus (* ane 74 z Griecheland, villicht z Athen; † 142 z Rom) isch Bischof vu Rom (ebbe 138–142) gsii.

Iber dr Hyginus isch fascht nyt iberliferet. Är soll Athener un Philosoph gsii syy oder aber dr Suhn vun eme Athener Philosoph. In dr Zyt vu sym Pontifikat sin d Gnoschtiker Valentinos un Kerdon, wu speter us dr Chilchen uusgschlosse wore sin, uf Rom chuu go dert lehre. Är giltet as Märtyrer, s git doderfir aber kaini Quälle me. Sy Fescht isch dr 11. Jänner.